वैजापूर तालुक्यातील एका युवकाने गावातील नागरिकांसोबत फुले विकण्यासाठी शहरातील गुलमंडी सिटी चौक व जाधव वाडी फुल मार्केटमध्ये फुले आणली होती.हा युवक पुण्यामधून उच्च शिक्षण घेऊन शेती करतो. विद्यार्थ्यांने फुलाचे पीक घेतले असून विक्रीसाठी शहरात आला असता फुले विक्री न झाल्याने रस्त्यावर बसून दोन ते तीन रुपये प्रति किलोने विक्री करत आहे. दिवसभर ग्राहक न मिळाल्याने चार ते पाच पोती फुलांची तशीच पडून आहेत.आज सिडको परिसरातील काळा गणपती या ठिकाणी हा युवक दोन ते तीन रुपये प्रति किलो फुलांची विक्री करत होता. येणाऱ्या जाणाऱ्या भाविकांना आवाज देऊन दोन रुपये किलो तीन रुपये किलो फुले घ्या असे म्हणत होता. तरीही खरेदी करण्यासाठी पाहिजे तसा ग्राहक त्याला मिळत नव्हता. एवढा खर्च करून शेतात पिकवलेली फुले रोडवरही फेकून देता येत नाही या उद्देशाने तो दिवसभर शहरात फुले विकत असल्याचे विवेक शिंदे यांनी सांगितले.