धुळे तालुक्यातील अजंग येथील शेतकऱ्याची एकीकडे पीकविमा मिळविण्यासाठी पायपीट सुरू असताना त्याच्या शेतावर दुसऱ्यानेच चक्क पीकविमा काढल्याचा धक्कादायक प्रकार समोर आला आहे. त्यामुळे यंदा पीकविमा योजनेचा लाभ देण्यास टाळाटाळ केल्यास आंदोलन करू, असा इशारा तक्रारदार शेतकरी तुळशीराम माळी आणि मुलगा भाऊसाहेब माळी यांनी दिला.
तक्रारदार शेतकरी भाऊसाहेब माळी यांनी सांगितले की अजंग गावात तुळशीराम हरकू माळी व मुलगा भाऊसाहेब यांची दोन हेक्टर ३९ आर वडिलोपार्जित मिळकत आहे. वारसाहक्काने मिळालेली ही शेतजमीन दीर्घकाळापासून ते कसत आहेत ही जमीन पितापुत्राच्या कब्जे व उपभोग वहिवाटीत असली तरी नितेश रसिकलाल ओसवाल नामक अनोळखी व्यक्तीने परस्पर शेतीच्या उताऱ्यावर मोठ्या स्वरूपाच्या नोंदी घेत परस्पर विमा काढून घेतला आहे. या शेतात आजही भुईमूग, कपाशीसह इतर पिके घेतली जात असून, गेल्या अनेक वर्षांपासून पीकविमा काढला जात आहे. यंदा पिकविमाचा लाभ मिळावा म्हणून अर्ज केला होता त्यावेळी ही धक्कादायक बाब आमच्या लक्षात आली.
पिक विमा योजनेचा लाभ मिळावा म्हणून आज फॉर्म भरण्याची शेवटची मुदत असल्याने शेतकरी भाऊसाहेब माळी हे अत्यंत हवालदिल झाले आहेत आता या योजनेचा लाभ मला मिळणार की नाही या दुविधेत ते आहे. या पीकविमा योजनेचा लाभ मिळावा व संबंधित व्यक्तीवर कायदेशीर कारवाई व्हावी अशी मागणी त्यांनी जिल्हाधिकाऱ्यांकडे केली आहे.