२८ डिसेंबर रोजी भाजपाच्या वतीने परळी तहसील कार्यालयाच्या समोरील मैदानात भव्य कला व क्रीडा महोत्सवा अंतर्गत सीएम चषक क्रिकेट स्पर्धेचे आयोजन करण्यात आले होते. या महोत्सवात क्रिकेट बरोबरच रांगोळी, चित्रकला, धावण्याची स्पर्धा, कुस्ती आणि कबड्डी या स्पर्धांचेही आयोजन करण्यात आले होते.
यावेळी पंकजा मुंडे यांनी युवकांना प्रोत्साहित केले. त्या म्हणाल्या की, भाजपने राज्यभर आयोजित केलेल्या सीएम चषक स्पर्धांमुळे युवकांना प्रोत्साहन मिळत आहे. या अगोदरही शहरात गौरी गणेश महोत्सव, टर्निंग पाँईंटच्या वतीने आपण महिला, युवक व शालेय विद्यार्थ्यांच्या कला व क्रीडा गुणांना वाव देणारे कार्यक्रम हाती घेतले होते. आता मैदानी स्पर्धा यानिमित्ताने घेण्यात येत आहेत. शहरात क्रीडा स्पर्धेसाठी चांगले वातावरण तयार होत आहे, त्याला अधिक वाव देण्यासाठी भव्य क्रीडा संकुल उभारण्याचा माझा विचार आहे, त्यासाठी लागणा-या जागेचा प्रश्नही आपण सोडवू अशी ग्वाही त्यांनी यावेळी दिली.
शुभेच्छांसह पंकजा मुंडे यांनी स्वत: मैदानात उतरुन बॅटींग आणि बॉलिंगही केली.