धक्कादायक : रूग्णाला ड्रिप मधून रक्ताच्या ऐवजी दिल गेलं मोसंबी ज्युस, रूग्णालयाला लागलं टाळं...

 उत्तरप्रदेशमधील प्रयागराज येथील एका रूग्णालयात डेंग्युच्या रूग्णाला पेशी कमी झाल्याने रक्त पेढीतून रक्त चढवण्याची वेळ आली. त्यावेळी त्या रूग्णाला रक्त पिशवीतून रक्ताच्या ऐवजी मोसंबीचा रस चढवल्याचा धक्कादायक प्रकार घडला. यानंतर त्या रूग्णाचा मृत्यू देखील झाला. मृताच्या कुटूंबियांनी या रूग्णालयावर कारवाई करण्याची विनंती राज्य सरकारवर केली आहे.

प्रयागराज (पूर्वीचे अलाहाबाद) येथील ग्लोबल हॉस्पिटल आणि ट्रॉमा सेंटरमध्ये 32 वर्षीय रुग्णाच्या नातेवाईकांनी 'प्लाझ्मा' म्हणून नोंद असलेल्या पिशवीत मोसंबीचा रस दिल्याचा आरोप केला आहे. रूग्णाच्या कुटुंबाचा आरोप आहे की रूग्णालयाने पुरवलेल्या एका पिशवीतून रक्तसंक्रमण केल्यानंतर त्यांची प्रकृती बिघडली. रुग्णाला दुसऱ्या खाजगी रुग्णालयात हलवण्यात आलं जिथे त्यांचा मृत्यू झाला. कुटुंबाने सांगितले की, या दुसऱ्या रुग्णालयातील डॉक्टरांनी त्यांना 'प्लेटलेट' बॅग बनावट असल्याचं सांगितलं आणि प्रत्यक्षात त्या पिशवीत मोसंबी ज्यूसचं मिश्रण असल्याचं समोर आलं.

रूग्णालयातील कर्मचार्‍यांवर कठोर कारवाई करण्याची मागणी मृताच्या कुटुंबीयांनी केली आहे. "माझी 26 वर्षांची बहीण विधवा आहे. मला योगी आदित्यनाथ सरकारने या त्रुटींबद्दल रुग्णालयावर कठोर कारवाई करावी अशी माझी इच्छा आहे," असे रुग्णाचे नातेवाईक सौरभ त्रिपाठी यांनी सांगितले.

एका ट्विटमध्ये उपमुख्यमंत्री ब्रजेश पाठक म्हणाले की, "रुग्णालयात डेंग्यूच्या रुग्णाला प्लेटलेट्सऐवजी मोसंबीचा रस टाकण्यात आल्याच्या व्हायरल व्हिडिओची दखल घेत, माझ्या निर्देशानुसार हॉस्पिटल सील करण्यात आले आणि प्लेटलेटची पाकिटे चाचणीसाठी पाठवण्यात आली आहेत.." "दोषी आढळल्यास रुग्णालयावर कठोर कारवाई केली जाईल," असं देखील पाठक म्हणाले.

मुख्य वैद्यकीय अधिका-यांच्या सूचनेनुसार रुग्णालय सील करण्यात आले आणि नमुन्याची चाचणी होईपर्यंत ते असेच राहील, असे प्रयागराजच्या अतिरिक्त मुख्य वैद्यकीय अधिकाऱ्याने माध्यमांना दिलेल्या निवेदनात म्हटले आहे.

रूग्णांच्या नातेवाईकांनी स्वतः प्लेटलेट्स खरेदी केल्या होत्या, असे सांगत रूग्णालयाने आरोपांचे खंडन केले आहे. रुग्णालयाच्या मालकाने सांगितले की, रुग्णाच्या प्लेटलेट्सची पातळी 17,000 पर्यंत घसरली, त्यानंतर त्याच्या नातेवाईकांना रक्ताच्या प्लेटलेट्सची व्यवस्था करण्यास सांगण्यात आले.

"त्यांनी सरकारी रुग्णालयातून प्लेटलेट्सचे पाच युनिट आणले. तीन युनिट्सच्या रक्तसंक्रमणानंतर, रुग्णाची प्रतिक्रिया होती. म्हणून आम्ही ते थांबवले," हॉस्पिटलच्या मालकाने एका निवेदनात म्हटले आहे, ते पुढे म्हणाले की ते तपासाचे समर्थन करतात. प्रयागराजचे जिल्हा दंडाधिकारी संजय कुमार खत्री म्हणाले, "चौकशी सुरू आहे आणि प्लेटलेट्सचीही चाचणी केली जाईल."