'साक्षी मलिकचा धक्कादायक दावा: कुस्तीपटूंच्या आंदोलनामागे बबिता फोगटचा हात'

ऑलिम्पिक पदक विजेत्या साक्षी मलिकने 'विटनेस' नावाने एक पुस्तक लिहीले आहे ज्यात साक्षीने खळबळ जनक दावे केले आहेत. भारतीय कुस्ती महासंघाचे माजी अध्यक्ष ब्रिजभूषण सिंह यांच्या विरोधात चाललेल्या आंदोलनाची आखणी भाजपा नेत्या बबिता फोगट यांनीच केली असल्याचा आरोप ऑलिम्पिक पदक विजेती कुस्तीपटू साक्षी मलिकने केला आहे. तिच्या 'विटनेस' या पुस्तकात या आंदोलनाचे गूढ पार्श्वभूमीचा उल्लेख करण्यात आला असून, या चर्चेत बबिता फोगट यांची भूमिका अधिक पुढे आली आहे.

साक्षी मलिकने इंडिया टीव्हीला दिलेल्या मुलाखतीत स्पष्ट केले की, बबिता फोगटने कुस्तीपटूंच्या बैठकीत भाग घेतला आणि त्यांना ब्रिजभूषण सिंह यांच्यावर आरोप करण्यास प्रेरित केले. "बबिता फोगटने आमच्याकडे येऊन आंदोलन करण्यास सांगितले. तिचा वैयक्तिक अजेंडा होता, कारण तिला भारतीय कुस्ती महासंघाचे अध्यक्षपद मिळवायचे होते," असं साक्षीने स्पष्ट केले.

कुस्तीपटूंचे हे आंदोलन एक वर्षाहून अधिक काळ चालले होते, ज्यामुळे संपूर्ण देशभरात चर्चा झाली. या आंदोलनामुळे ब्रिजभूषण सिंह यांना २०२४ लोकसभा निवडणुकीत तिकीट नाकारण्यात आले आणि त्यांना कुस्ती महासंघातून बाहेर पडावे लागले.

साक्षी मलिकने सांगितले की, "आम्हाला वाटले की, बबिता फोगट आम्हाला समर्थन करेल आणि अन्याय व छळवणुकीच्या विरोधात आवाज उचलेल. पण तिने आमच्याबरोबर येण्याऐवजी या प्रकरणातच एक मोठा खेळ खेळला."

या संदर्भात बबिता फोगटवर आरोप करताना साक्षीने सांगितले की, "काँग्रेसने आमच्या आंदोलनाला पाठिंबा दिला, अशी अफवा होती. परंतु भाजपाच्याच दोन नेत्यांनी आम्हाला हरियाणामध्ये आंदोलन करायची परवानगी दिली होती, ज्यामध्ये बबिता फोगट आणि तीर्थ राणा यांचा समावेश होता."

या आंदोलनाच्या पार्श्वभूमीवर साक्षीने वैयक्तिक आयुष्याविषयीही विचार व्यक्त केले आहेत. तिने स्पष्ट केले की, आपल्या कारकिर्दीत बहुतेक पुरस्कार रक्कम तिच्या कुटुंबीयांनी काढून घेतली, आणि विवाहाच्या बाबतीत तिने ठाम भूमिका घेतली.

साक्षी मलिकच्या या आरोपांनी कुस्तीपटूंच्या आंदोलनाच्या राजकीय संदर्भावर खळबळ उडाली आहे. बबिता फोगट यांची भूमिका आता अधिक चर्चेत येईल, आणि यामुळे आगामी काळात या प्रकरणात आणखी काही घडामोडी होण्याची शक्यता आहे.