पेट्रोल पंपावर मोदींचा तोंडावर आणि डोळ्यांवर पट्टी बांधलेला फोटो लावा :सचिन सावंत

पेट्रोल, डिझेलच्या दरवाढीने उच्चांक गाठला असताना नरेंद्र मोदी सरकार मात्र त्यातून जनतेला दिलासा देण्याचा कोणताच प्रयत्न करताना दिसत नाही. मोदींनी सत्तेच्या पिचवरून आवेशाने पुढे येत शेवटची लाथ जनतेच्या पेकटात टाकून पेट्रोलचे शतक आवेशपूर्ण व दणदणीतपणे पूर्ण केलेले आहे. जनतेची हार झालेली असून त्यांच्या निवडक उद्योगपती मित्रांची मात्र जीत झालेली आहे असे सावंत यांनी म्हटले आहे.

इंधन दरवाढीवर मोदी सरकारचा समाचार घेताना सावंत पुढे म्हणाले की, पेट्रोल, डिझेल, एलपीजी गॅसचे भाव प्रचंड वाढलेले असून जनता त्यात होरपळून निघत असताना पंतप्रधान नरेंद्र मोदी सरकारने मात्र हात वर करत या जीवघेण्या महागाईकडे पूर्ण दुर्लक्ष केले आहे. मोदी सरकारच्या कृतीचे प्रतिक स्पष्टपणे दिसण्यासाठी त्यांनी डोळ्यावर पट्टी बांधलेला फोटो पेट्रोल पंपावर लावावा अशी त्यांनी मागणी केली.

पेट्रोल, डिझेलच्या एक्साइज ड्युटीमधून मोदी सरकारने जनतेची लूट करत तब्बल २० लाख कोटींपेक्षा जास्त नफा कमावलेला आहे तर दुसरीकडे उद्योगपतींचे मात्र ८.५० लाख कोटी रुपयांचे कर्ज राईट ऑफ केलेले आहे. विजय माल्या, निरव मोदी सारखे बँक लूटेरे परदेशी बसून मजा मारत आहेत आणि बँकांमध्ये घोटाळे वाढतच आहेत. त्याकडे मोदी सरकारचे लक्ष नाही मात्र जनतेची लूट राजरोसपणे सुरु आहे. "जनतेचं कंबरडं मोडलं फार, पेट्रोल झालं सौ पार आणि गेले सहा वर्ष पाहतंय मोदी सरकार", अशी परिस्थिती झाली आहे, असे सावंत म्हणाले.