मंत्री विजय वडेट्टीवार अडचणीत: पासपोर्ट जप्त

राज्याचे मदत आणि पुनर्वसन मंत्री तसेच काँग्रेस नेते विजय वडेट्टीवार यांचा पासपोर्ट जप्त करण्यात आला आहे. वडेट्टीवार यांनी त्यांच्याविरुद्ध दाखल गुन्ह्याची माहिती पासपोर्ट अर्जात लपवल्याचे समोर आल्याने ही कारवाई करण्यात आली आहे. वडेट्टवार यांनी पासपोर्ट अर्जात गुन्ह्यांची माहिती लपवल्याचा आरोप करणारी याचिका मितेश भांगडीया यांनी मुंबई हायकोर्टाच्या नागपूर खंडपीठात दाखल केली होती. न्यायालयाच्या आदेशानुसार नागपूर पासपोर्ट कार्यालयाने कागदपत्रांची तपासणी करून वडेट्टीवार यांना प्रत्यक्ष बोलावले तेव्हा वडेट्टीवार यांनी त्यांचा पासपोर्ट जमा केला होता. तो पासपोर्ट आता जप्त करण्यात आला आहे. तसेच याप्रकरणी आता पासपोर्ट नागपूर कार्यालय चौकशी करीत आहे.

विजय वडेट्टीवार यांच्याविरोधात याचिका करणारे मितेश भांगडिया हे विधान परिषदेचे माजी सदस्य आहेत. काँग्रेस नेते वडेट्टीवार यांनी नागपूर येथे पासपोर्टसाठी दोन वेळा अर्ज करताना त्यांच्याविरुद्ध प्रलंबित असलेल्या गुन्ह्यांची माहिती त्यात दिलेली नाही. याबाबत पोलीस आणि मुख्यमंत्री कार्यालयाला माहिती देऊनही त्यावर कोणतीच कारवाई करण्यात आली नाही. त्यामुळेच मला कोर्टात धाव घ्यावी लागली असे भांगडिया यांचे म्हणणे आहे.

हायकोर्टात या याचिकेवर सुनावणी झाल्यानंतर मंत्री विजय वडेट्टीवार यांना नोटीस बजावण्यात आली होती. न्या. ए. एस. चांदुरकर आणि न्या. अमित बोरकर यांच्या खंडपीठाने ही नोटीस बजावली होती व त्यावर चार आठवड्यांत उत्तर मागितले होते. वडेट्टीवार यांनी पासपोर्टसाठी मनोरा या आमदार निवासाचा पत्ता दिला होता व तेथील स्थानिक पोलीस स्टेशनचं ना हरकत प्रमाणपत्रही सोबत जोडलं होतं. वडेट्टीवार यांच्यावर कोणताही गुन्हा दाखल नसल्याचे या एनओसीत नमूद करण्यात आले होते.

त्यावरच आक्षेप घेत बांगडिया कोर्टात गेले आहेत. विजय वडेट्टीवार यांनी यावर प्रतिक्रिया देताना सर्व आरोप फेटाळले आहेत. हे माझ्या विरोधातील राजकीय षडयंत्र असल्याचा प्रत्यारोप त्यांनी केला आहे. 'माझ्यावर कोणताही गंभीर गुन्हा दाखल नसून जे चार गुन्हे दाखल आहेत ते किरकोळ राजकीय गुन्हे आहेत', असा दावा केला आहे.