देशातील 40 पत्रकारांवर पिगॅसस (Pegasus spyware) स्पायवेअरच्या माध्यमातून पाळत ठेवली गेल्याचे उघड झाल्याने संपूर्ण देशात खळबळ उडाली आहे. हा प्रकार उघड झाल्यानंतर Digipub News India Foundationने तीव्र शब्दात या प्रकाराचा निषेध केला आहे. फाऊंडेशनतर्फे एक पत्रक प्रसिद्ध करण्यात आले आहे. पिगॅसस स्पायवेअर वापरुन काही पत्रकारांच्या फोनमध्ये घुसखोरी करण्यात आल्याचे वृत्त प्रसिद्ध झाले आहे. हा अत्यंत गंभीर प्रकार आहे. केवळ अधिकृत सरकारांनी दिलेल्या फोन नंबरमध्ये आम्ही हेरगिरी करतो असे सांगणाऱ्या NSO कंपनीच्या स्पायवेअरचा वापर हेरगिरी कऱण्यासाठी का केला गेला, असा सवाल उपस्थित करण्यात आला आहे.
या कृत्याचा आम्ही तीव्र निषेध करतो, तसेच आपल्यावर पाळत का ठेवली गेली आणि कुणी ही पाळत ठेवली, हे जाणून घेण्याचा जनतेला अधिकार आहे. त्यामुळे केंद्र सरकारने या प्रकरणाची सखोल चौकशी करावी अशी मागणी करत आहोत, असेही या पत्रकात संघटनेने म्हटले आहे.