कल्याण - कसारा रेल्वेस्थानकादरम्यानचा एक धक्कादायक प्रकार समोर आला. या स्थानकादरम्यान चालत्या मालगाडीतील महिला गार्डचा विनयभंग करण्यात आला. हि महिला गार्ड मालगाडीवर ड्यूटीवर असताना हा सर्व प्रकार घडला.
हि महिला ज्या मालगाडीत ड्युटीवर होती ती गाडी रेल्वे यार्डात पोहचत होती. त्याचवेळी गाडीचा वेग कमी होण्याचा फायदा घेत दोन अनोळखी इसम महिला गार्डच्या केबीनमध्ये घुसून त्यांनी त्या महिलेसोबत गैरवर्तन केले. महिलेने आरडाओरड करताच त्या दोघांनी तिथून पळ काढला.या सर्व प्रकारबाबत महिलेने कोळसेवाडी पोलीस ठाण्यात तक्रार नोंदवली. यासंदर्भातील पुढील चौकशी रेल्वे पोलीस करीत आहेत. महिला गार्डसोबत घडलेल्या या धक्कादायक प्रकारामुळे पुन्हा महिला सुरक्षेबाबतचा प्रश्न समोर आला आहे.