राज्यात महायुती व मविआ चा जागावाटपाचा फॉर्म्युला अंतिम टप्प्यात

लोकसभेची आचारसंहिता मार्च महिन्याच्या पहिल्या आठवड्यात लागू होण्याचे संकेत आहेत. त्यामूळे सर्वच पक्षांकडून जागावाटपाचे सूत्र अंतिम करण्याच्या दृष्टीने हालचाली सूरू आहेत. पंतप्रधान नरेंद्र मोदी व गृहमंत्री अमीत शाह यांच्या उपस्थितीत गुरूवारी भाजपच्या केंद्रीय निवडणूक समितीची नवी दिल्लीत बैठक पार पडली. त्यामध्ये पहिल्या टप्प्यातील ११० ते १२० उमेदवारांच्या नावांवर अंतिम शिक्कामोर्तब करण्यात आला. येत्या एक-दोन दिवसांत ही यादी जाहीर केली जाईल.

राज्यातही महायुती व महाविकास आघाडी या प्रतिस्पर्ध्यांमधील जागावाटपाचा फॉर्म्युला आता शेवटच्या टप्प्यात पोहचला असून शिंदे गटाने २२ जागांवर दावा केला असला तरी त्यांच्या ४ ते ५ जागा आपल्या ताब्यात घेण्याचा भाजपचा आग्रह आहे. लोकसभेसाठी सक्षम उमेदवार नसल्याने व विधानसभा डोळ्यासमोर ठेवून शिंदे गटाने भाजपची ही अट मान्य करण्याची तयारी दाखवली आहे.

महाविकास आघाडीत ठाकरे गटाला २० ते २२, काँग्रेसला १५ ते १७ जागा मिळू शकतात. युती-आघाडीत राष्ट्रवादीच्या दोन्ही गटांना दुय्यम स्थान मिळणार असून युतीत अजित पवार गटाला व आघाडीत शरद पवार गटाला १० जागांच्या आतच समाधान मानावे लागणार आहे. प्रकाश आंबेडकरांच्या वंचित बहुजन आघाडीला ३ जागा देण्यास आघाडीचे नेते तयार झाले आहेत. मविआतर्फे ४८ उमेदवारांची यादी मार्चच्या पहिल्या आठवड्यात जाहीर होईल अशी शक्यता आहे.