Pune ST Accident : एसटीचा ब्रेक फेल; ६ ते ७ वाहनांना धडक
पुण्यात भरधाव एसटीचा(ST) अपघात झाल्याची धक्कादायक घटना समोर आली आहे. भरधाव एसटी बसचा अचानक ब्रेक फेल झाल्याने या एसटीने रस्त्यावरील ६ ते ७ वाहनांना धडक दिली आहे. या अपघातात सहाजण जखमी झाल्याची माहिती मिळाली आहे. पुण्यातील रामटेकडी येथे मंगळवारी रात्री हा अपघात घडला आहे.
पुण्यातील हडपसर मार्गावर कायम वाहतूक कोंडी असते. दरम्यान, रामटेकडी येथे मंगळवारी रात्री या मार्गावर हा मोठा अपघात झाला. सांगोला ते स्वारगेट एसटी बस हडपसर येथील रामटेकडी पुलावरून रात्री ८ च्या सुमारास आली असता ब्रेक फेल झाल्याचे चालकाने वाहकाला सांगितले. बसमध्ये तब्बल ३० प्रवासी यावेळी होते.
हा प्रकार कळताच गाडीतील सर्व प्रवासी जिवाच्या आकांताने घाबरले. त्यांनी ओरडण्यास सुरुवात केली. दारम्यान, याचवेळी ब्रेक न लागल्याने बसने रामटेकडी पुलावरील ६ ते ७ वाहनांना धडक दिली. यात काही कारचा चक्काचूर झाल्याने त्यांचे मोठे नुकसान झाले. तर ६ नागरीक जखमी झाले आहेत. त्यांना तातडीने जवळील रूग्णालयात उपचारासाठी दाखल करण्यात आले आहे. या अपघातामुळे या मार्गावर मोठी वाहतूक कोंडी झाली होती.
