मोदींनी घेतली ममता बॅनर्जी यांची भेट

पंतप्रधान नरेंद्र मोदी आणि पश्चिम बंगाल च्या मुख्यमंत्री ममता बॅनर्जी यांची आज भेट झाली. पश्चिम बंगालच्या निवडणुकीच्या काळात दोनही नेत्यांनी एकमेकांवर मोठ्या प्रमाणात टीका केली होती. या निवडणुकीत भाजपचा दारुण पराभव झाला होता. या पराभवानंतर मोदी आणि ममता बॅनर्जी यांची आज पश्चिम बंगालच्या मिदनापुर जिल्ह्यातील कलाईकुंडा या विमानतळावर भेट झाली.

आज पंतप्रधान नरेंद्र मोदी पश्चिम बंगालमध्ये आलेल्या 'यास' चक्रीवादळाने झालेल्या नुकसानीची पाहणी करण्यासाठी पश्चिम बंगालच्या दौऱ्यावर आहेत. या वेळी ममता आणि मोदी यांची विमानतळावर 15 मिनिटं बैठक झाली. या बैठकीत चक्रीवादळात किती नुकसान झाले? या संदर्भात चर्चा झाल्याची माहिती आहे.

या आठवड्याच्या सुरुवातीला पश्चिम बंगाल आणि शेजारील ओडिशा राज्यात मोठं नुकसान झालं आहे. याची पाहणी मोदी आज करत आहे. दरम्यान विधानसभा निवडणुकीत भाजपने ममता बॅनर्जी यांच्या विरोधात सर्व हातखंडे वापरुन देखील विजय मिळाला नव्हता. त्यानंतर ममता आणि मोदी यांची झालेली ही भेट त्यामुळं महत्त्वाची मानली जात आहे.