8 जणांना उडवणाऱ्या ट्रकचालकाला पाठलाग करुन पकडले
रायगड: रेवदंडा येथील रोह्याकडे येणाऱ्या ट्रकच्या चालकाने दारुच्या नशेत बेधुंदपणे गाडी चालवत रेवदंडा ते चणेरापर्यंत आठ जणांना उडवल्याची धक्कादायक घटना घडली आहे. यातील तिघांचा जागीच मृत्यू झाला आहे. तर 1 महिला अत्यवस्थ आहे. रेवदंडा बाजूकडून एमएच 04 ई वाय 8501 या ट्रकच्या चालकाने बेधुंदपणे गाडी चालवत साळाव, आमली येथे प्रत्येकी एका व्यक्तीला , तर चेहेर येथे दोन व्यक्तींना उडवले. त्यानंतर भरधाव वेगाने गाडी रोह्याकडे चालवत नेली.
पुढच्या गावात याची माहिती मिळताच स्थानिकांनी तो ट्रक अडवण्याचा प्रयत्न केला. पण ट्रकचालकाने अनेक गाड्या व अडथळे उडवून लावत न्हावे फाट्यानजीक एका जोडप्याला आणि त्यांच्या लहानग्या मुलाला धडक दिली. यामध्ये जिल्हा परिषद शाळेचे शिक्षक लक्ष्मण ढेबे व त्यांचा मुलगा यांचा जागीच मृत्यू झाला असून , त्यांच्या पत्नीचे दोन्ही पाय निकामी झाले आहेत. त्यानंतर या चालकाने सारसोली गावाच्या पुढे चणेरा इथे उदय वाकडे यांना धडक दिल्याने त्यांचा जागीच मृत्यू झाल. भरधाव वेगाने ट्रक चालवणाऱ्या या चालकाला चांडगावनजीक स्थानिक युवकांनी धाडसाने पकडून पोलिसांच्या हवाली केले आहे.
