मंत्री आदित्य ठाकरेंना चिडविल्याने शिवसेना आक्रमक, विधान भवनात आचारसंहिता लागू करण्याची मागणी

मुंबई // विधिमंडळाच्या आवारात निदर्शने करताना भाजप आमदार नितेश राणे यांनी मंत्री आदित्य ठाकरे यांना हिणवण्यासाठी असभ्यपणे आवाज काढल्याचा व असे प्रकार रोखण्याची गरज असल्याचा विषय शुक्रवारी विधानसभेत शिवसेनेचे आमदार सुनील प्रभू यांनी उपस्थित केला. त्यास पाठिंबा देत आमदारांचे सभागृहाबाहेरील वर्तन कसे असावे याची आचारसंहिता तयार करण्यासाठी समिती नेमण्याची मागणी भाजपचे आमदार सुधीर मुनगंटीवार यांनी केली. विधान भवनाच्या पायऱ्यांवर भाजपचे आमदार बसून आंदोलन करीत असतानाच पर्यटनमंत्री आदित्य ठाकरे हे येताच "म्याव.. म्याव" असा आवाज काढण्यात आला. यावरून भाजप आमदार नितेश राणे यांनी ठाकरे यांना ट्वीट करून डिवचले. त्याचे पडसाद शुक्रवारी विधानसभेत उमटले. शिवसेना आमदार सुनील प्रभू यांनी हा मुद्दा उपस्थित करीत संबंधित आमदाराच्या विरोधात कारवाईची मागणी केली. अशा पद्धतीने नक्कल व आवाज काढणे चुकीचे असल्याचे मत विरोधी पक्षनेते देवेंद्र फडणवीस यांनी व्यक्त केले. कोणाचीही मानहानी होणार नाही याची सर्वांनीच खबरदारी घेतली पाहिजे, असे सांगत फडणवीस यांनी स्वपक्षीय आमदाराचे कान टोचले.