थरारक...सात वर्षाच्या चिमुकलीच्या गळ्याला नागाचा विळखा

मुलीच्या गळ्याला नागाने विळखा घातल्याची घटना सेलू तालुक्यातून समोर आली आहे, हा संपूर्ण थरार मोबाईल कॅमेरात कैद झाला आहे. सेलू तालुक्यातील झडशी गावाजवळच्या बोरखेडी कला येथील दिव्यानी पद्माकर गडकरी ही चिमुरडी मध्यरात्री गाढ झोपेत असताना अचानक नागाच्या फुसकारण्याचा आवाज आला, आणि शेजारी झोपलेले वडील जागे झाले. अचानक घरात जमिनीवर झोपलेल्या मुलीच्या गळ्यात गुंडाळलेला नाग पाहून पालकांचीही भंबेरी उडाली. बाजूलाच झोपून असलेल्या आईला उठवून शेजाऱ्यांना बोलविण्यात आले. गळ्याला नागाचा विळखा पाहून काहीच सुचेनासे झाले. झोपेत असणाऱ्या मुलीचे डोळे उघडले. पण पालकांनीच तिला 'हलू नको बेटा स्तब्ध रहा !' असाच सल्ला दिला. मुलगी घाबरली नाही , शांत पडून राहीली. रात्रीत लगेच सर्पमित्रांना बोलविण्यात आले. रात्री बारा वाजता गळ्याला विळखा घातलेला नाग तब्बल मध्यरात्री दोन वाजेपर्यंत तशाच अवस्थेत राहिला.

अखेर असह्य झाल्यावर मुलीने हालचाल केली आणि नागाने दिव्यानीला दंश केला. दिव्यानीवर सध्या सेवाग्राम रुग्णालयात उपचार सुरू आहेत.