मुक्ता बर्वे ‘स्वर्गीय स्मिता पाटिल स्मृती पुरस्कार २०१८’ने सन्मानित...

१६ डिसेंबर रोजी मराठी सह हिंदी सिनेसृष्टी गाजवणाऱ्या, तसेच आपल्या संवेदनशील अभिनयाने रसिकांच्या मनात आपली वेगळी छबी निर्माण केलेली अभिनेत्री स्मिता पाटील यांचा ३२ वा पुण्यतिथी दिन होता. या निमित्ताने दुसरा ‘स्वर्गीय स्मिता पाटिल स्मृती पुरस्कार २०१८’ जाहीर करण्यात आलेला आहे.

नुकताच प्रदर्शित झालेल्या ‘मुंबई पुणे मुंबई-३’ या चित्रपटाची अभिनेत्री मुक्ता बर्वे हिला ‘स्वर्गीय स्मिता पाटिल स्मृती पुरस्कार २०१८’या पुरस्काराने गौरविण्यात आले आहे. मालिका, नाटक आणि सिनेमा या तीनही माध्यमांतून रसिक प्रेक्षकांना मुक्ताने आपल्या अभिनयाने भुरळ घातली आहे. तिच्या याच एकंदरीत कारकीर्दीमुळे तिला या पुरस्काराने सन्मानित करण्यात आले.

मुक्ताने यासंबंधी संवाद साधताना ती म्हणाली, "मुंबई पुणे मुंबई ३ चे यश आणि लगेचच स्मिता पाटील कौतुक पुरस्कार जाहीर होणे हा माझ्यासाठी दुर्मिळ योग आहे. हा पुरस्कार जाहीर झाल्याने मला आकाश ठेंगणे झाले आहे. स्मिता पाटील यांचा अभिनय आवडला नाही असा माणूस अख्ख्या भारतीय चित्रपटसृष्टीमध्ये शोधून सापडणार नाही. त्यांच्या अभिनयाला तोड नाही, या पुरस्कारामुळे स्मिता पाटील यांच्या सोबत नाव जोडले जाते याचा मला मनस्वी आनंद आहे त्यांच्याशी माझी तुलना होऊच शकत नाही त्यामुळे हा एक कौतुक पुरस्कार आहे. हा पुरस्कार म्हणजे आजवर केलेल्या कामाचे कौतुक आणि पुढील कामासाठी मला प्रोत्साहन देणारा आहे, असे मी मानते."