पंतप्रधान मोदी यांचा आज तीन राज्यात दौरा; निवडणूक प्रचाराला सुरूवात

लोकसभा निवडणूकीच्या तयारीसाठी पंतप्रधान नरेंद्र मोदी यांचा तीन राज्यात दौरा होणार असून ते रविवारी निवडणूक प्रचाराचा भाग म्हणून बिहार, बंगाल आणि मध्यप्रदेश या तीन राज्यांना भेट देणार आहेत. या दौऱ्याची सुरुवात बिहारपासून करून पंतप्रधान नवादा येथे एका जाहीर सभेला संबोधित करणार आहेत. पहिल्या टप्प्यात मतदान होत असलेल्या चार मतदारसंघांपैकी नवादा हा एक मतदारसंघ आहे. जमुईमध्ये गुरुवारी मोठ्या जनसमुदायाला संबोधित केल्यानंतर मोदींची ही दुसरी रॅली असेल. दरम्यान, पंतप्रधानांच्या रॅलीनंतर बिहारचे मुख्यमंत्री नितीश कुमार नवादा येथे रोड शो करणार आहेत.

पंतप्रधान नरेंद्र मोदी मध्य प्रदेशमध्ये भारतीय जनता पक्षाच्या निवडणूक प्रचाराची सुरुवात करणार आहेत. जबलपूर मतदारसंघात ते रोड शोचे नेतृत्व करणार आहेत.

1.2 किमी मार्गावरील रोड शो शहीद भगतसिंग क्रॉसिंगपासून सुरू होईल आणि जबलपूरच्या गोरखपूर येथील आदि शंकराचार्य क्रॉसिंगवर समारोप होईल, असे भाजपचे शहराध्यक्ष प्रभात साहू यांनी माध्यमांना सांगितले.