उद्धव ठाकरे यांच्या मुलाखतीवर शिंदे गटाची पहिली प्रतिक्रिया

शिवसेनेतील बंडानंतर माजी मुख्यमंत्री उद्धव ठाकरे यांची पहिली मुलाखत सामनाचे संपादक संजय राऊत यांनी घेतली आहे. या मुलाखतीचा पहिला भाग मंगळवारी प्रसारित करण्यात आला. या मुलाखतीमध्ये उद्धव ठाकरे यांनी बंडखोर आमदारांवर जोरदार टीका केली आहे. शिवसेनेतून सडका पालापाचोळा उडून गेला आहे, या शब्दात उद्धव ठाकरे यांनी टीका केली आहे.

उद्धव ठाकरे यांच्या या मुलाखतीमधील टीकेला शिंदे गटातून आमदार संजय शिरसाट यांनी उत्तर दिले आहे. यात उद्धव ठाकरे यांनी बंडखोरांना पालापाचोळा म्हटले आहे, त्या टीकेला उत्तर देताना "३८ वर्ष आम्ही शिवसेनेसाठी काम केले आम्ही पालापाचोळा कसे, उद्या तुम्हाला पालापाचोळा म्हटले तर चालेल का? असा सवालही संजय शिरसाट यांनी उपस्थित केला आहे.

तसेच संजय राऊत यांचे ऐकून उद्धव ठाकरे यांनी काँग्रेस आणि राष्ट्रवादी सोबत जाण्याचा निर्णय घेतला, त्यामुळेच शिवसेनेत फूट पडली, पण उद्धव ठाकरे यांना अजूनही संजय राऊत हेच जवळचे वाटतात, अशीही टीका शिससाट यांनी केली आहे.