नारायण राणेंबाबतच्या त्या पत्राची PMO कडून दखल, विनायक राऊत यांचा दावा

नारायण राणे यांची केंद्रीय मंत्रिमंडळातून हकालपट्टी करा, अशी मागणी शिवसेनेचे खासदार विनायक राऊत यांनी पंतप्रधान नरेंद्र मोदी यांच्याकडे केली आहे. राऊत यांनी पंतप्रधान नरेंद्र मोदी यांना पत्र लिहून ही मागणी केली. या पत्राची पंतप्रधान कार्यालयाने १० मिनिटांत दखल घेतल्याचा दावा विनायक राऊत यांनी केला आहे. विनायक राऊत यांनी ट्विट करुन याबबातची माहिती दिली. "देशाचे पंतप्रधान नरेंद्र मोदी यांनी अवघ्या दहा मिनिटात ह्या पत्राची दखल घेतली. दुपारी त्यांच्या कार्यालयातून मला फोन आला आणि मला सांगितलं पंतप्रधान बैठकीत व्यस्त आहेत. तुम्ही गृहमंत्री अमित शाह यांच्याशी बोला, तुमचं तक्रार पत्र मी अमित शाह यांच्याकडे पाठवलं आहे!" असे विनायक राऊत यांनी म्हटले आहे.

केंद्रीय मंत्री नारायण राणे यांनी मुख्यमंत्री उद्धव ठाकरे यांच्याविरोधात केलेल्या आक्षेपार्ह वक्तव्यानंतर राज्यात शिवसेना विरुद्ध भाजप असा संघर्ष रंगला आहे. हा सर्व वाद सुरू असताना आता पंतप्रधान नरेंद्र मोदी यांनी राणे यांना केंद्रीय मंत्रिमंडळातून काढून टाकावे अशी मागणी शिवसेनेचे खासदार विनायक राऊत यांनी केली आहे.

विनायक राऊत यांनी पंतप्रधान नरेंद्र मोदी यांनी पत्र लिहून ही मागणी केली आहे. "नारायण राणे यांनी आपल्या महाड येथील पत्रकार परिषदेत महाराष्ट्राचे मुख्यमंत्री उद्धव ठाकरे यांच्या कानाखाली देण्याची भाषा वापरली. राणे आपल्या अशा भाषेतून समाजाला कोणता संदेश देण्याचा प्रयत्न करत आहेत....असा प्रश्न मला पडला आहे. केंद्रीय मंत्रिपदाची मर्यादा सोडून असे वक्तव्य करणाऱ्या नारायण राणे यांना मंत्रिपदावर राहण्याची कोणताही अधिकार नाही, असे मला वाटते. हा तर पंतप्रधान नरेंद्र मोदी यांचा अपमान आहे. त्यामुळे नरेंद्र मोदी यांनी नारायण राणे यांचा तात्काळ राजीनामा घेऊन मंत्रिमंडळातून काढून टाकावे, अशी नम्र विनंती मी आपणास करतो"

असे विनायक राऊत यांनी आपल्या पत्रात म्हटले आहे.