पंकजा मुंडे यांना एकटे पाडणे हेच भाजपचे धोरण, सामनातून भाजपवर निशाणा

राज्यसभेच्या सहा जागांपाठोपाठ राज्यात विधानपरिषद निवडणूकीचे बिगूल वाजले आहे. त्यापार्श्वभुमीवर राज्यात राजकारण तापले आहे. यामध्ये पंकजा मुंडे यांना तिकीट नाकारले आहे. त्याचा सामनाच्या रोखठोक सदरातून थेट समाचार घेण्यात आला.

राज्यसभेच्या सहा जागांसाठी निवडणूक झाली. या निवडणूकीपाठोपाठ राज्यात विधानपरिषद निवडणूक होणार आहे. मात्र विधानपरिषदेसाठी भाजपने पंकजा मुंडे यांना उमेदवारी नाकारली आहे. त्यावर सामनाच्या रोखठोक सदरातून सडकून टीका केली आहे.

सामनाच्या रोखठोकमध्ये म्हटले आहे की, विधानपरिषद निवडणूकीत पंकजा मुंडे यांना भाजपने डावलले. गोपिनाथ मुंडे आणि पंकजा मुंडे यांना मानणाऱ्या कार्यकर्त्यांना पदे द्यायची पण पंकजा मुंडे यांना एकटे पाडायचे असे धोरण भाजपचे असल्याची टीका करण्यात आली आहे.

देवेंद्र फडणवीस यांच्या जवळच्या लोकांना उमेदवाऱ्या देण्यात आल्या आहेत. त्यामुळे फडणवीस स्वतःची फळी निर्माण करीत आहेत. मात्र यामध्ये निष्ठावान कार्यकर्ते दिसत नसल्याचे सामनाच्या रोखठोकमध्ये म्हटले आहे. राष्ट्रवादी काँग्रेसमधून आलेल्या अनेकांची मोट बांधण्यात आली आहे. त्यांना राज्यसभेपासून ते विधानपरिषदेपर्यंत सहज उमेदवारी मिळते. सदाभाऊ खोत, पडळकर, बोंडे यांना उमेदवारी मिळते. पण पक्षासाठी ज्या खडसे यांनी आयुष्य झिजवले त्यांना पक्ष सोडावा लागतो. पंकजा मुंडे यांचा अपमान करून त्यांना डावलले जाते. मात्र प्रेषित पैगंबर यांचा अपमान करणाऱ्या नुपूर शर्मा यांना फडणवीस फोन करू बेटी चिंता मत करो, असा धीर देतात तेव्हा आश्चर्य वाटते. कारण ज्या नुपूर शर्मामुळे देश दहशतवादी हल्ल्यांच्या स्फोटकांवर उभा आहे. त्यांना एक नेता पाठींबा कसा देऊ शकतो? असा सवाल सामनातून फडणवीस यांना केला आहे.

भाजप नेत्या पंकजा मुंडे वाऱ्यावर आहेत. मात्र देशात अराजक माजवणाऱ्या नुपूर शर्मा यांना राजाश्रय असल्याची टीका सामनाच्या रोखठोक सदरातून केली आहे. भाजपने संभाजीराजे यांना अपक्ष उमेदवार बनवले नाही. राज्यसभा निवडणूकीचे निकाल लागले. भाजपचा विजयोत्सव सुरू आहे. पण शिवसेनेने संभाजीराजे यांना उमेदवारी न दिल्याचे फळ त्यांना मिळाल्याचे देवेंद्र फडणवीस म्हणाले. मग भाजपकडून संभाजीराजे यांना अपक्ष उमेदवार बनवून विजयी का केले नाही? कारण त्यांना सर्व ठिकाणी राजकारणाचा व्यापार आणि राजकारण हेच धोरण आहे. त्यामुळे विधानपरिषदेची निवडणूकही तागडीवरच ठेवली आहे. त्यामुळे केंद्रीय यंत्रणांची लाठी काठी सोडली तर भाजपच्या हाती काय आहे? असा सवाल उपस्थित केला आहे.

काळा पैसा हेच भाजपचे बलस्थान

देशात हिंदू आणि मुस्लिम अशी फाळणी केली जात आहे. पैगंबरांविषयी काढलेले उग्दार याच शाळेची शिकवण आहे. तसेच लाखो कोटी रुपयांचा काळा पैसा आजही आपल्या व्यवस्थेत खेळतो आहे. काळा पैसा ज्या मक्तेदार भांडवलशाहीतून निर्माण झाला. ती भांडवली मक्तेदारी मोडून काढण्याचे आश्वासन देऊन मोदी सत्तेवर आले. मात्र तो काळा पैसा अजून तसाच आहे. एवढंच नाही तर हा काळा पैसा हेच भाजपचे बलस्थान असल्याचे रोखठोकमध्ये म्हटले आहे.

भाजपचे राज्य नसलेल्या राज्यात भ्रष्टाचारावरून रान पेटवले जाते. पण निवडणूकीसाठी कोट्यावधी रुपये कुठून येतात? असा सवाल रोखठोकमध्ये केला आहे.