दीड वर्षाच्या लॉकडाऊननंतर मराठी सिनेमा आणि नाट्यसृष्टी आता प्रेक्षकांच्या भेटीसाठी सज्ज झाली आहे. आता निर्बंध उठवण्यात आल्यानंतर थिएटर्सदेखील सुरू झाली आहेत. लॉकडाऊननंतरचा पहिला मराठी सिनेमा रिलीजसाठी सज्ज झाला आहे. शैलेश नरवाडे दिग्दर्शित आणि मिलिओरिस्ट फिल्म स्टुडिओची निर्मिती असलेला 'जयंती' हा लॉकडाऊननंतरचा पहिला मराठी सिनेमा प्रेक्षकांच्या भेटीला येतो आहे. या सिनेमाच्या पहिल्या गाण्याची झलक आता प्रेक्षकांना पाहता येणार आहे.
१२ नोव्हेंबर रोजी हा सिनेमा प्रदर्शित होणार आहे. जयंती जसा लोकांचा हक्काचा सण आहे तसाच तो अलवार उलगडत जाणाऱ्या प्रेमाचा सर्वोच्च उत्सव देखील आहे. नावातील वेगळेपणामुळेच हा सिनेमा प्रदर्शनाआधीच चर्चेत आला आहे. आर्टिकल १५, मुल्क, थप्पड यासारख्या सिनेमांना संगीत देणारे दिग्गज संगीतकार मंगेश धाकडे यांनी या सिनेमाला संगीत दिले आहे, तर प्रसिद्ध गायक जावेद अली यांनी या सिनेमात गाणी गायली आहेत. गीतकार गुरू ठाकूर यांनी या सिनेमातील गाणी लिहिली आहेत.
दिग्गज कलाकारांसह नवोदित कलाकारांच्या अदाकारीचा अनोखा मिलाफ या सिनेमामध्ये प्रेक्षकांना अनुभवता मिळणार आहे. ऋतुराज वानखेडे, तितिक्षा तावडे या कलाकारांचे या सिनेमातून पदार्पण होत आहे. तर मिलिंद शिंदे, वीरा साथीदार, किशोर कदम, पंढरीनाथ कांबळे, अंजली जोगळेकर आणि अमर उपाध्याय या कलाकारांनी या सिनेमामध्ये भूमिका साकारल्या आहेत.